નાનપણથી જ તેમનું જીવન સંધર્ષમય રહ્યું હતું. આત્મબળ અને હિંમતને કારણે દરેક સંધર્ષનો તેમણે એક સૈનિકની માફક સામનો કર્યો અને દરેક પ્રતિકૂળ પરિસ્થતિને સાનુકૂળ બનાવી જીવનમાં આગળ ને આગળ વધતા રહ્યા. ડગલું ભર્યું તે ના હટવું એ નરેન્દ્ર મોદીનો ગુરુમંત્ર રહ્યો છે. નરેન્દ્ર મોદીની સ્વભાવની વિશેષતા છે કે એક વાર આગળ ડગલું માંડયું પછી ક્યારેય પાછું વાળીને જોવાનું નહીં અને હાથમાં લીધેલું કામ ક્યારેય હારીને - થાકીને પડતું મૂકવાનું નહીં! તેમણે રાજ્યશાસ્ત્રમાં અનુસ્નાતકની ડિગ્રી મેળવી તેઓ રાષ્ટ્રીય સ્વયંસેવક સંઘ (આરએસએસ) ના સ્વયંસેવક બન્યા. આ સંસ્થામાં રહીને તેઓ નિઃસ્વાર્થપણું, સામાજિક નિષ્ઠા અને દેશભિક્તના પાઠો ભણ્યા અને યુવાન વયે પોતાનું સર્વસ્વ ભારતમાતાને ચરણે સમર્થન કરી સંઘના પ્રચારક બન્યા.
